Bikarinn heim

Nú þegar maður er aðeins búinn að jafna sig eftir gleði helgarinnar þá er maður farinn að spá aðeins í lokaleik deildarinnar á föstudag. Við spilum við Fjarðabyggð og vinnum við þann leik erum við 1.deildarmeistarar. Það er alveg á hreinu að þó að við séum komnir upp þá erum við ekki saddir fyrr en við erum búnir að vinna deildina og sættum við okkur ekki við neitt annað. Ekki er ennþá vitað hvar leikurinn verður spilaður en það eru 3 möguleikar í stöðunni. Nr 1 er að spila á grasinu á Eskifirði þar sem þeir spila venjulega en völlurinn er eitthvað slæmur held ég. Nr 2 er að leikurinn verði á gervigrasvellinum í Neskaupstað og nr 3 er að spila í höllinni á Reyðarfirði. Ég væri alveg til í að spila í Neskaupstað en þar spilaði ég í eitt ár þegar ég var yngri og hef aldrei spilað þar síðan þannig að það væri sérstakt fyrir mig. 

Óli Stefán 

Komnir upp

Það var nátturlega bara gaman í gær þegar úrvalsdeildarsætið var tryggt. Menn voru alveg einbeittir allan tímann, nema hugsanlega þegar ónefndur maður tók víti sem klikkaði all svakalega. Þessi árangur er ekki bara okkur leikmönnum að þakka heldur öllum þeim sem að þessu koma ásamt áhorfendur sem voru frábærir í gær. Nú er bara að tryggja efsta sætið og klára sumarið með stæl. Eftir vikuna fara leikmenn og stjórn í kærkomið frí til Tenerife en stjórnin hét okkur þessari ferð fyrir sæti í efstu deild og sýnir þetta bara þann metnað vilja sem stjórn Grindavíkur býr yfir. 

Óli Stefán 

Ég mæli með..

að þið komið vel klædd á leikinn á morgun. Við getum þakkað arkitektum stúkunnar fyrir það að það verður skjól fyrir áhorfendur í austan áttinni. Hann er að spá vaxandi austan með rigningu þannig að vindurinn kemur í bak stúkunnar og svo er þetta líka fína þak yfir stúkunni þannig að ekki ætti að rigna á ykkur annað en okkur leikmenn. Hitinn verður um 7 gráður (ætli það sé tilviljun að það verði akkurat SJÖ stiga hiti???) þannig að það er um að gera að mæta bara í kraftgallanum í gulu utan yfir og taka kaffibrúsa með sem yljar ykkur ásamt snilldar spilamennska beggja liða.

Óli Stormur 

Leikstíll

Þeir sem þekkja Jankó og hafa æft undir hans stjórn vita nákvæmlega hvernig bolta hann vill spila. Frá því við byrjuðum að æfa 15.nóv í fyrra þá höfum við verið að æfa stuttar sendingar og að halda bolta innan liðs. Það tekur tíma og mikla þolinmæði að ná upp svona leikstíl og oftar en ekki kemur þetta niður á úrslitum leikja. Nú held ég að þessi vinna sé loks að skila því sem maður hefur verið að bíða eftir. Við höfum oft á tíðum spilað vel í 45-60 min og dottið svo niður. Við náðum að skila þessum bolta í nánast 90 min í síðasta leik og spiluðum reyndar mjög vel á móti Breiðablik í síðustu viku líka. Þegar Jankó tók við 1999 tók alveg eitt ár að ná þessu, eftir það vorum í toppbaráttu í 3 ár. Vonandi er þetta komið til að vera og ekkert annað en toppbarátta næsta sumar í efstu deild. 

Til þess að við eigum að gera einhverjar vonir um gott sumar í efstu deild næsta sumar þá verðum við að klára leikinn á morgun við granna okkar úr Sandgerði. Góðir íþróttamenn kunna að bera virðingu fyrir andstæðingunum og fyrir því sem þeir eru að gera og það gerum við svo sannarlega. Reynir er að byggja upp fyrstudeildarlið og það á mörgum heimamönnum sem er frábært og vonandi tekst þeim það. Við höfum farið í gegnum flest lið i deildinni án þess að vanmeta neitt þeirra og það sama verður uppá teningnum á morgun. 

Við leikmenn hittum á góðan dag á móti Fjölni og það gerðuð þið í stúkunni líka. Ég las á spjallinu á umfg.is það sem Hammerinn skrifaði um að til að fá góða stemmningu þurfa leikmenn að spila vel. Ég get ekki með nokkru móti verið sammála honum þó að vissulega skemmi það ekki fyrir að leikmenn spili vel. Ég segi hins vegar að þegar illa gengur og mikill mótbyr er þá er stuðningur og sú stemmning sem ég veit að fólk hér í Grindavík getur búið til fleitt liðinu í gegnum það. Stuðningsmenn KR þurftu allavega ekki góða spilamennsku síns liðs til að hirða stúkunna í fyrra þegar við áttum einn af okkar bestu leikjum sem spilaðir hafa verið á Grindavíkurvelli. Ekki sé ég heldur áhorfendur í kop stúkunni hjá ónefndu liði halda kjafti þegar þeirra lið spilar hörmulega eins og þeir gera oftast hehe

Óli Stefán 

Frábær leikur, frábærir stuðningsmenn

Loksins náðum við að sýna okkar fólki almennilega hvað við getum og hverju við erum góðir í, að halda bolta og spila á fáum snertingum. Maður bara fann það þegar við byrjuðum að við værum að detta á góðan dag, jafnvel þó að við lendum undir. Við spiluðum þann bolta sem að Jankó vill að við spilum og þá er ekki að spyrja að því. Ég var samt ekki alveg sáttur við að falla niður þegar við komumst yfir eins og er farið að gerast nokkuð oft en það kom ekki að sök því að við kláruðum leikinn með stæl.

Og þið gott fólk eigið stóran þátt í þessu því að þetta var það besta sem ég hef heyrt í sumar ásamt fyrsta leiknum á móti Stjörnunni. Þrátt fyrir rigningu og kulda var mikið fjör og læti of þetta gerir leikinn svo miklu miklu skemmtilegri.

Næst er það Reynir heima og ég skora á menn að ganga ekki að neinu vísu í þeim leik. Þetta verður hörku leikur og ef við höfum okkur ekki alla við þá fáum við ekkert úrúr honum. Ef einhverjir eiga að þekkja það að vera í botnbaráttu þá erum það við og við vitum því að þeir koma til með að gefa gjörsamlega allt í þennan leik. Hins vegar er mikið í húfi fyrir okkur því að fyrsta sætið er handan við hornið og þess virði að leggja allt í það að hirða dolluna. Takk fyrir góðan dag og auðvitað gerum við laugardaginn enn betri.

Óli Stefán 

Grindavík-Fjölnir

Nú er komið að einum af stærstu leikjum okkar í sumar og það er á móti Fjölni. Við höfum lent í smá mótlæti í síðustu leikjum þar sem fátt hefur fallið með okkur. Fjölnir er eitt heitasta lið landsins í dag og er komið alla leið í úrslitaleikinn í bikarnum. Með sigri á okkur á morgun komast þeir einnig á toppinn í þessari deild og fara fjórum stigum á undan okkar. Það sér það því hvert mannsbarn hversu mikilvægur leikur þetta er fyrir okkur.

Núna bið ég ykkur gott fólk að mæta á völlinn í gulu og láta í ykkur heyra. Ég bara held að fólk geri sér ekki grein fyrir hvað stuðningur hefur mikið að segja í svona leikjum. Ekki get ég sagt að þetta hafi þetta sumar hafi verið það besta sem stuðningsmenn okkar hafa átt þó svo að ég ætli aldrei að fara að gera lítið úr því fólki sem mætir á völlinn. Maður þarf ekki að leita lengra en upp á Laugardagsvöll þegar við spiluðum síðustu landsleiki en þar höfðu leikmenn á orði að fólk í stúkunni hafi svo til gert gæfumunin í þessum leikjum og þarna erum við að tala um menn sem eru vanir að spila fyrir tugi þúsunda í hverri viku.

Ég legg til að annar og þriðji flokkur karla og kvenna taki þetta verkefni að sér og búi til stemmningu sem að ég veit að þið getið. Takið svo hina með ykkur og búum til dag sem við eigum seint eftir að gleyma og jafnvel dag sem verður upphafið að einhverju nýju í stúkunni. Ég veit að þetta er kannski ekki í mínum verkahring að biðja um stemmningu en þar sem það er frítt á völlinn og við erum að tala um það að komast í úrvaldsdeildina að ári, því það er ekki komið ennþá, þá held ég að þið sem vetlingi getið valdið endilega komið og hjálpið okkur upp úr þessari deild því við þurfum á ykkur að halda.

Óli Stefán 

Slakur leikur

Maður væri að ljúga ef maður færi að halda því fram að við hefðum verið að spila okkar besta bolta í gær því það gerðum við svo sannarlega ekki. Ég reyndar held því alveg statt og stöðugt fram að við áttum aldrei skilið að tapa heldur. Jafntefli hefði verið sanngjarnt því ekki voru eyjapeyjar betri en við.

Aðstæður voru ekki góðar að því leitinu til að það stóð sterkur norðan vindur beint á annað markið. Ég reyndar átti valið og valdi með vindi í fyrrihálfleik. Við byrjuðum vel og tókum völdinu og spiluðum eins og við eigum að gera. Markið lá í loftunu og kom það eftir 10 min þegar Númi þrumaði boltann í netið. Eftir þetta mark hættum við að spila. Við fáum algjört aulamark á okkur eftir röð mistaka en boltinn rétt fór yfir línuna og stoppaði án þess að ná í netið. Í seinni hálfleik hafði vidurinn aukist til muna og þeir pressuðu stíft en við stóðum allt af okkur og vorum að ná tökum á leiknum þegar þeirra maður var allt í einu langt fyrir innan eftir skot og kláraði leikinn. Eftir markið vöknuðum við aftur og fórum að spila okkar bolta en það dugði ekki

Það sem pirrar mig mest er að við virðumst ekki geta drepið leikina og haldið áfram okkar skipulagi. Alltaf þegar við komumst yfir þá hættum við að spila og förum að reyna e-ð annað sem við æfum aldrei.

Nú er þetta þannig að eigum frestaðan leik heima á miðvikudag við Fjölni og það er engum blöðum um það að flétta að ef við ætlum ekki að enda í rugli og lífbaráttu um efstudeildarsæti þá verðum við að vinna þann leik. Ég veit að við getum það þó að Fjölnir sé með hörkulið, við virðumst bara vera farnir að gleyma því að við erum það líka.

Óli Stefán 

Frestað

Leiknum við ÍBV sem átti að fara fram í dag var frestað. Þetta fór því eins og ég spáði fyrr í vikunni en það var löngu útséð að við myndum ekki spila í dag. Þegar við áttum að fljúga kl 10 í morgun var 31m á sek á Stórhöfða. Við gerðum okkar besta í því að fá leiknum flýtt og spila hann á föstudagskvöld en ÍBV neitaði þeirri ósk. Í stað þess að spila í blankalogni eins og var í Eyjum á föstudag þá vildu þeir frekar spila í stormi og ógeðisveðri eins og spáð var. Leiknum er frestað til morguns en það spáir ágætu þá.

Óli Stefán 

ÍBV-Grindavík

Jæja þá er loks komið að leik í þessari deild okkar en við höfum ekki spilað síðan við töpuðum á móti Þrótti. Leikur morgundagsins er á móti ÍBV í Eyjum. Reyndar er ekkert útséð með hann útaf veðri en maður verður bara að undirbúa sig eins og hann verði á morgun þangað til annað kemur í ljós. Við leikmenn tókum léttan fund í dag með stjórn og þjálfara og er mikill samhugur í mönnum og við ákveðnir að tryggja sætið eða fara langt með það á morgun. Við höfum spilað vel í æfingaleiknum og á æfingum þannig að menn hafa sjaldan verið betur búnir í svona slag en akkurat núna. Eyjapeyjarnir verða að vinna til að eiga séns á því að ná okkur og koma því til með að selja sig dýrt. Mætum því hressir uppá völl í fyrramálið ákveðnir í að ná í þessi 3 stig á morgun þvi að við eigum vissulega að geta það. 

Óli Stefán 

Ekkert sérstök veðurspá

Eitt af því sem mér finnst gaman að gera er að spá í veðrið. Ætli það sé ekki bara alið upp í manni á netaverkstæðinu með öllum sjóurunum að spá í veðrið, hvort að það verði bræla þennan dag eða ekki. Þetta áhugamál hefur fylgt manni í gegnum árin en hefur færst úr því að spá í hvort það verði róið í það að spá í hvort það verði leikur. 

Núna eru tveir dagar í leik útí Eyjum og útlitið ekki bjart með veðrið. Eins og sést hér spáir veðurstofa íslands stormi kl 12.00 í Vestmannaeyjum og get ég ekki með nokkru móti séð að það verði spilað á laugardag. Á sunnudag verður hins vegar mun skaplegra veður eins og sést hérna og því mun gáfulegra að spila leikinn þá. 

Segjum að leikurinn verði á sunnudag en þá skapast nýtt vandamál og það er að við eigum inni frestaðan leik við Fjölni og er hann settur á þriðjudag. Það yrði því alltof stuttur tími á milli leikja og þá þyrfti að fara að færa þann leik til.

Leikjum á íslandi er yfirleitt ekki frestað vegna veðurs nema að það sé ekki flugfært. Mér finnst það oft á tíðum algjör vitleysa því að það segir sig sjálft að það hefur ekki nokkur maður gaman að því að spila hvað þá horfa á fótbolta ef að það væri stormur eins og hann spáir á laugardag. 

 Óli Stormur