Leikjaálag

Þegar við spiluðum við Reyni á fimmtudaginn síðasta var það 6.leikur okkar á 13 dögum. Þó að við höfum byrjað með stóran hóp þá hefur fækkað í honum jafnt og þétt og við svona leikjaálag þá verður auðvitað meiri hætta á meiðslum en við höfum heldur betur fengið okkar skammt af þeim. Sem betur fer fórum við samt stórslysalaust í gegnum þetta tímabil og erum við núna í 10 daga fríi útaf bikarumferðinni. Þetta frí er vel nýtt því að Jankó gaf mönnum 3 daga helgafrí og við sem eigum við smávægileg meiðsl að stríða getum níðst á meistara Srecko. Liðin sem eru í næstu fjórum sætum á eftir okkur komust öll áfram í bikarnum þannig að ekkert þeirra nær eins góðri hvíld og við. Þetta getur að mínu mati verið lykilinn af því að komast upp því að næstu tveir leikir eru við lið í öðru og fimmta sæti,Fjarðarbyggð og Stjörnuna, heima. Grindavík hefur ekki tapað á heimavelli síðan 26. júlí 2005 og við erum ekkert að fara að taka upp á því núna. Reyndar bárust okkur samt leiðinlegar fréttir í dag því Micael Jónsson sem spilaði svo frábærlega í fyrstu leikjunum verður ekki meira með á þessu tímabili því hann var að fá það á hreint að hann þarf aðgerð útaf slitnu krossbandi. Við félagarnir óskum Mike góðs bata og vonum að hann komi sterkari til baka.

Óli Stefán 

Þetta er bara gaman

Það er sko ekki leiðinlegt að vera Grindvíkingur í dag skal ég segja ykkur. Við komum okkur í frekar þægilega stöðu með sigri á grönnum okkar úr Sandgerði. Ég ætla svosem ekkert að fara í leikinn neitt frekar en samt að minnast á þann karakter og samheldni sem einkennir okkar lið í dag. Eftir að Paul karlinn fékk rautt þá í stað þess að gefast upp þá bættu menn við og vorum í raun mikið betri einum færri. Sandgerðingar fá rós í hnappagatið frá okkur fyrir frábæra aðstöðu og umgjörð í kringum leikinn. Stuðningsmenn þeirra eru til fyrirmyndar og ég hef fulla trú á því að þeir eigi eftir að festa sig í sessi sem alvöru fyrstu deildarlið. Það var einnig gaman að því að sjá svona marga Grindvíkinga á leiknum og ég held að það sé að myndast mikil og góð stemmning í bænum. Ég get svo svarið það að þetta er farið að líta það vel út hjá okkur að Raggi Ragg skellti brosi á inní klefa og var bara þræl jákvæður.

Óli Stefán

Hin hliðin á stuðningsmanni Grindavíkur : Vignir Helgason

Vignir er fótboltaáhugamönnum um allt land að góðu kunnur enda gerði hann garðinn frægan hér áður með tæklingum sem enn er talað um. Reyndar er hann hvað frægastur fyrir það að hafa verið í djúpu lauginni þar sem hann sigraði, en fáir áttu von á því vegna þess að þeir sem voru með honum voru einfaldlega taldir sigurstranglegri. Karlinn er búsettur í Glasgow þar sem hann er að ljúka námi en hann fylgist mikið með boltanum hér heima og kemur á leiki þegar hann er í fríi. Í ljósi þess að við erum að fara að spila við Reyni þá er gaman að sjá hina hliðina á Vigni því að öll rauðu spjöldin 5 sem hann hefur fengið á ferlinum voru einmitt á móti þeim.

 

Fullt nafn: Guðmundur Vignir Helgason

 

Gælunafn: Einhverra hluta vegna hafa nöfn eins og Jaxlinn - Köggull - Fallegur - Prinsinn - Tuddinn - Massinn - Naglinn - Kassinn - Gaurinn - Stykkið - Kóngurinn - Iceman osfrv. loðað við mig.  En þar sem ég er nú fremur hógvær þá vil ég helst láta kalla mig Vigni.

 

Aldur: Löglegur í "old boys" en samt í hörku formi.

Giftur/sambúð: Hvað er þetta?  Mér líður eins og ég sé að fylla út umsókn hjá Lánasjóðnum.

Börn: Og aðrir minna þroskaðir menn.

 

Hvað eldaðir þú síðast? Eldaði í gærkveldi fyrir elskuna mína.  Hafði lítin tíma en týndi það til sem var í ísskápnum.  Hafði glóðasteikta humarhala með ferskum hvítlauk, brytjuðum tígristönnum og brasilískum Amazon-furuhnetum í forrétt.  Stráði yfir það feskri þéttskorinni basiliku og vætti með því að kreista olíu úr nokkrum ferskum ítölskum ólífum.  Skolaði því niður með hvítu Pinot Gris Reserva.  Í aðalrétt eldaði ég portvíns-marenaraðar súdanskar antilópulundir með djúpsjávar söltuðum jarðeplum og styrjuhrongafroðu frá Kaspíahafi.  Drakk Chateau frá Bordeaux frá fyrri uppskeru 1982 með.  Í eftirrétt hafði ég svo kæstan indverskan mango-kókóshnetuís með apríkósumauki og kólómbískum toffíbættum kaffibaunum.  Endaði svo á léttum expressó.  Annað var það nú ekki.

 

Hvað vilt þú fá á pizzuna þína? Eru til menn sem fá sér alltaf það sama?  Það fer allt eftir því hvað mig hungrar í hverju sinni.

Hvernig gemsa áttu? Nýju línuna frá samstarfsverkefni Samsung, Siemens, Nokia og iPod.  15 mg, 20 megapixela digital myndavélasíma með sítengdri breiðbands netvinnslu, kjarnorku örgjörfa og 30 milljón mismunandi hringitónum.  Á svo hulstur úr krókódílaforhúð.  Ekki að það skipti nú annars einhverju máli.

Uppáhaldssjónvarpsefni? Fréttir og fræðsluefni.  Bara kerlingar eins og Sibbi sem horfa á örvæntingafullar húsmæður. 

Besta bíómyndin? Fékk eitt sinn Djúpan háls með Lindu Lovelace lánaða frá Sibba.  Fannst hún nokkuð góð.  Vel leikin og góð sviðsmynd.

Hvaða tónlist hlustar þú á? Allt frá The Clash til Emiliönu Torrini.  Bob Dylan til Sigurrósar.  Einnig Jonny Cash, Massive attack, Radiohead ofl.  Fer nokkuð víða.  Er núna að hlusta á "Till the sun turns black" með Ray Lamontagne.  Hörkugóður.

Uppáhaldsútvarpsstöð? Hlusta helst á XFM Scot um þessar mundir.

Uppáhaldsdrykkur? Vatn við þorsta, vín með mat.  Pint af bjór yfir boltanum og stundum gin sem sterkari vímugjafa.

 

Uppáhaldsvefsíða ? Tja, einu sinni lánaði ég Nökkva Má tölvuna mína og síðan þá hefur síðan bigtits.com verið föst sem "Home"-síðan mín og ég ekki getað breytt því þrátt fyrir að hafa mikið reynt.  Samt er hún ekki uppáhaldsvefsíðan mín.

 

Ertu hjátrúarfullur fyrir leiki (ef já, hvernig þá?)? Nei og er voða lítið fyrir að kyssa á mér fingurna, éta gras og góna út í loftið eins og svo margir fótboltakallar gera.  En fer annars alltaf í sturtu eftir leiki, finnst það alveg nauðsynlegt.

Hvernig er best að pirra andstæðinginn? Hvísla "mamma þín er MILF"  í eyrað....... nei annars ég er ekkert fyrir svona lagað.

 

Hvaða liði myndir þú aldrei spila með? Vil ekki útiloka neitt en það væri erfitt að spila með erlendu landsliði með íslenskt vegabréf.

 

Hvert var átrúnaðargoð þitt á yngri árum? Þegar ég var ungur og vitlaus þá var það miðvarðakletturinn Pálmi Hafþór Ingólfsson, sem þá var krullhærður og með sítt að aftan.  Þegar ég varð svo 12 ára áttaði ég mig á því að ég gat sett markið hærra og leit upp til Alan Hansen hjá Liverpool.

Erfiðasti andstæðingur? Spilaði einu sinni á móti Atla Eðvalds þegar hann var í KR.  Hann þótti sterkur í loftinu og því var ég settur á hann.  Fyrsti leikur sem hann spilaði án þess að vinna skallaeinvígi.

EKKI erfiðasti andstæðingur? Spilaði einu sinni á móti Ásgarðsliðinu í firmakeppninni.  Öðru eins samansafni af wannabís og galgopun hef ég aldrei mætt.

Besti samherjinn? Verð að launa Sibba greiðann og láta það koma fram hér að krossarnir hans voru magnaðir.  Poisonous!

 

Sætasti sigurinn? Allir sigrar eru sætir.  Meira að segja þegar við unnum Njarðvík 15-0 í 6. flokki.  Þeir gátu ekki neitt.

 

Mestu vonbrigði? Man að í stöðunni 15-0 á móti Njarðvík þá setti ég hann í innanverða stöngina.  Alger vonbrigði að skora ekki.

Uppáhalds lið í enska boltanum? Liverpool og Wimbledon

Uppáhaldsknattspyrnumaður? Varnarjaxlinn Gunnar Már Gunnarsson var í uppáhaldi.  Sívinnandi og eitilharður í návígum.  Óstöðvandi í loftinu.  Maður að mínu skapi.

Besti íslenski knattspyrnumaðurinn fyrr og síðar? Mér fannst ég aldrei fá þá viðurkenningu sem ég átti skilið.

 

Efnilegasti knattspyrnumaður landsins? Án efa, Helgi Már Helgason.  Ólafur Daði er einnig framtíðarmaður í boltanum.

Fallegasti knattspyrnumaðurinn í deildinni?  Mér finnst Eysteinn eiga meiri athygli skilið fyrir heiðarlegt bros og fallegan limaburð.  Svo er hann herðabreiður, hermannalegur í framgöngu og ekkert fyrir það að þvo sér upp úr brúnkukremi eða hárklístri eins og svo margar MTV fótboltagelgjurnar í deildinni.  Náttúruleg fegurð að austan.

 

Fallegasta knattspyrnukonan? Ray finnst mér bera af.

Grófasti leikmaður deildarinnar? Er Davíð Garðarsson ennþá að spila?  Nei annars.....

Besti íþróttafréttamaðurinn?  Samúel Örn Erlingsson.  Hann hefur góð tök á íslenskri tungu og svo er dóttir hans heit.

EKKI besti íþróttafréttamaðurinn? Henry er alltaf jákvæður.  Svolítið feitur þó.

 

 

Hver er mesti höstlerinn í liðinu? Hef heyrt að nýi aðstoðarþjálfarinn sé ekki við eina fjölina felldur.

Hefurðu skorað sjálfsmark? Nei, nei geri ekki svoleiðis.

 

Segðu okkur frá skemmtilegu atviki sem gerst hefur í leik:  Fannst drepfyndið þegar Sibbi meiddist á móti Val árið 1996. -That´s it, game over, þetta var þitt tækifæri.  Svona er víst boltinn.-

 

Spilar þú Championship Manager tölvuleikinn? Nei hef þarfari hluti við tímann að gera en að hanga í tölvuleikjum.

 

Hvenær lékstu þinn fyrsta leik með meistaraflokki?  Minn fyrsti alvöru leikur var árið 1994  á móti ÍR í 2. deildinni (núna 1. deild).  Spilaði leikinn á miðjunni og var fanta góður.

 

Hvernig finnst þér Fótbolti.net? Ekki eins góð og www.grindavik.blog.is/blog/grindavik/

 

Kíkir þú oft á Fótbolti.net? Nei, en kíkti þó áðan og áttaði mig á því af hverju þessi spurning er hér.

 

Ef þú mættir breyta einni reglu í fótbolta, hverju myndir þú breyta? Ég vill harðari refsingar við leikaraskap.  Húðstrýkingar að leik loknum þættu mér viðeigandi.  En svo skil ekki af hverju tveggja-fóta-tæklingar voru bannaðar.

 

Hvern vildir þú sjá á sviði? (tónleikum) Sá einu sinni Geimfarana á sviði en myndi helst ekki vilja sjá þá aftur.  Flestir orðnir full gamlir og feitir fyrir "comeback".

 

Hvað finnst þér leiðinlegast að gera á æfingu? Tilbreytingaleysi á æfingum gat oft farið í taugarnar á mér.

 

Hver er frægasta persónan sem þú ert með í farsímanum þínum? Gordon Strachan var eitthvað að reyna að ná í mig um daginn eftir að hafa séð mig spila með vinnufélögunum.  Ég nennti ekki að svara en númerið hans ætti að vera einhver staðar í missed calls.

 

Hver er uppáhaldsstaðurinn þinn í öllum heiminum? Erfitt að segja, held að ég eigi eftir að finna hann.  Því meira sem ég ferðast um heiminn þeim mun fleiri staði langar mig til að heimsækja

 

Hversu lengi ertu að koma þér í gang á morgnana? Full dónaleg spurning að mér finnst.

 

Hver er uppáhaldsÍÞRÓTTAMAÐURINN þinn? Margeir Pétursson er slyngur.

 

Fyrir utan knattspyrnu, fylgist þú með öðrum íþróttum? Já já.  Strandablak kvenna er ein af þeim.

 

Hver er uppáhalds platan þín? Eru þessar spurningar frá 1970?  Hlusta aðallega á diska núorðið.

 

Hvenær borgaðir þú þig síðast inn á knattspyrnuleik? Sá Sevilla vinna Espanyol í úrslitaleik UEFA um daginn á Hampden Park í Glasgow.  Ég sagði þeim að ég hafi eitt sinn spilaði í Evrópukeppninni; Helgason, don´t you remember? en þurfti samt að borga mig inn.

 

Í hvernig fótboltaskóm spilar þú? Hefðbundnum svörtum leður fótboltaskóm.

 

Í hverju varstu/ertu lélegastur í skóla?  Mig minnir að ég hafi alltaf verið hæstur í öllum greinum þannig að þessi spurning á eiginlega ekki við mig.

 

 

 

 

Óli Stefán

6 stiga sigur

Það fór mikil einbeitning í gang eftir leikinn á föstudag á móti Fjölni. Eftir þann leik var mönnum skipað að taka sjálfa sig í naflaskoðun sem ég tel að menn hafi gert. Allavega mættu menn 100% klárir í leikinn í gær og borguðu skuld sína við stuðningsmenn með góðum leik. Áhorfendur stóðu sig einnig mun betur og með þessu framhaldi verðum við í flottum málum. Nú framundan er svakalegur slagur við vini okkar úr Sandgerði. Það verður að vera sama hugarfar í þeim leik því að ef að það er eitthvað sem ég get lofað þá er það að Reynismenn koma til með að gera okkur lífið leitt. Þeir eiga líka flotta stuðningsmenn sem ég ber mikla virðingu fyrir og gaman að sjá hvað þeir standa þétt með sínum mönnum þrátt fyrir mótbyr. Leikurinn verður á fimmtudag í Sandgerði kl.20.00 og nú hvet ég sem flesta að mæta og gefa Hvíta hernum ekkert eftir í brekkunni.

Óli Stefán

Hugleiðing um gildi söngva

"In the beginning was the voice. Voice is sounding breath, the audible sign of life."

--Ibid 

 

 

 

"Svo skal böl bæta að benda á eitthvað annað" söng Megas snilldarlega í lagi nokkru sem ég man ekkert hvað heitir.

Sjálfsagt eru þeir fleiri en teljandi eru á fingrum handar sem telja mig vera að beita þeirri fornu aðferð sem meistarinn minnist þarna á í texta sínum. En það er fjarri lagi.

Grein Óla Stefáns hér fyrir neðan er snilldarlega skrifuð og segir í örfáum orðum allt sem segja þarf um frammistöðu okkar leikmanna í leiknum gegn hinu baráttuglaða liði Fjölnis sem hreinlega pakkaði okkur saman, nánast alls staðar á vellinum í gærkvöldi.

Þrátt fyrir dapran leik af okkar hálfu er staðan góð þegar um þriðjungur af mótinu er liðinn. Sex sigrar, eitt jafntefli og eitt tap hlýtur að teljast ásættanlegur árangur, þó svo auðvitað megi deila um spilamennskuna í hverjum leik fyrir sig.

Í hinni stuttu og hnitmiðuðu grein sinni kemur Óli Stefán inn á að helst vildi hann geta endurgreitt aðgangseyrinn þeim sem komu og horfðu á okkur.

Takið eftir því að þarna segir Óli ekki, þeim sem komu og tóku þátt í leiknum með því að láta í sér heyra, heldur þeim sem komu og HORFÐU Á okkur. 

Nú skal það algjörlega tekið fram og haft á hreinu að mér finnst það alveg hreint magnaður andsk... hvað það kemur alltaf margt fólk frá okkar tiltölulega smáa bæjarfélagi með okkur í útileikina og það jafnvel á föstudagskvöldum, og er það auðvitað frábært og ekkert nema gott eitt um það að segja, en spurningin er hins vegar:

Fyrst fólkið kemur á völlinn, hvers vegna syngur það þá ekki og lætur í sér heyra? 

 

 

Nú þykist ég þekkja stóran hluta af því fólki sem mætir á völlinn og er það upp til hópa hið hressasta og lífsglaðasta, svona dags-daglega, og lætur sig gengi liðsins miklu máli skipta, en eins og staðan er í dag, verður bara að segjast að stuðningurinn er að langmestu leyti í formi.........

nærveru.

Mín hugmynd er sú að það vanti fyrst og fremst frumkvæði, því ég held að allir vilji hafa góða og líflega stemmningu á vellinum. Einnig erum við lítið samfélag og að mínu mati er því mikilvægt að fólk telji það ekki fyrir neðan sína virðingu, eða ekki vera sitt hlutverk, að sleppa af sér beislinu og láta að sér kveða í stúkunni, því hjá okkur munar svo sannarlega um hvern og einn. Sú staðreynd að við erum lítið samfélag, þar sem allir þekkja alla, ætti einnig að mínu mati að gera það að verkum að við ættum að eiga auðveldara með að skapa þessa fjölskyldustemmningu og samstöðu allra sem að boltanum koma, á leikdegi.

Allir þeir sem fylgst hafa að einhverju ráði með fótbolta vita um mikilvægi öflugra stuðningsmanna og hvernig þeir geta tekið þátt í leiknum, sem 12. leikmaðurinn og hvatt leikmenn til þess að sýna af sér hámarks frammistöðu. Einnig vita menn að það er einfaldlega miklu skemmtilegra að vera í stúkunni, þegar góð stemmning er til staðar. Það hefur hins vegar oftar en ekki verið þannig að til þess að okkar ágætu áhorfendur komist í gang, þurfa leikmennirnir að kveikja í þeim með frammistöðu sinni og jafnvel dugar það stundum ekki, því mikið var um það rætt í fyrrasumar að þegar við vorum 5-0 yfir á móti K.R. að varla heyrðist stuna eða "eitt-gott-klapp" frá okkar fólki.

Sumir myndu segja að þetta væri eðlilegt, og ekki sé hægt að ætlast til þess að áhorfendur hvetji liðið þegar það stendur sig eins og það gerði gegn Fjölni, en ég get ekki að því gert að mér finnst það dálítið öfugsnúið. Það er ekki eins og Fjölnisliðið hafi verið að brillera að undanförnu, en samt var stór hópur syngjandi nánast stanslaust frá því áður en leikurinn var flautaður á.

Fram kemur í grein John Koopman, A brief History of singing, að söngur er fyrirbæri sem varð til áður en menn hófu að nota hljóð til þess að tala saman, og segir þar að ekki sé til sú menning byggð af mönnum, sama hversu frumstæð hún er eða einangruð, sem ekki syngi. Ekki er nóg með að söngur sé fornt fyrirbæri um allan heim, heldur þjónar hann tilgangi. Maðurinn syngur og hefur alltaf gert, til þess að ákalla guði, rifja upp sögu sína, efla og styrkja anda, samstöðu og vinabönd innan ákveðinna hópa og síðast en ekki síst, auðvitað, til þess að skemmta sér og öðrum.

Svo við förum nú aðeins dýpra í þetta, þá eru einnig til rannsóknir sem sýna að söngur, og þá sérstaklega í hóp, hafi góð áhrif á geðheilsu. Í einni þeirra, sem framkvæmd var árið 2002, var hópi manna skipt í tvennt. Annar hópurinn (sem við getum kallað "Fjölnismenn") var látinn syngja hópsöngva í hálftíma en hinn hópurinn (sem við getum kallað "Grindvíkinga") sat og hlustaði á. Fyrir og eftir sönginn og einnig viku eftir, var gerð mæling á skapi hópmeðlimanna með þróuðum spurningalista og kom þá í ljós að líðan þeirra sem voru í sönghópnum, var mun betri, eftir á.

Eðlilega.

Í hópnum sem söng mátti finna marktækt minni áhrif streitu, spennu, reiði, þreytu, kraftleysis og uppnáms.

Önnur rannsókn, framkvæmd af þeim Lesta og Petocz sem framkvæmd var á vistmönnum elliheimilis á aldrinum 80-97 ára, leiddi í ljós að þátttaka í hópsöng hafði í för með sér bætta geðheilsu og bætta félagslega hegðun.

Á vefsíðunni Health and Wellness má svo finna grein þar sem niðurstaðan er sú að hvort sem fólk syngi saman í barbershop-kvartett, gospel-kórum, eða á hvaða formi sem er, þá sé það fólk sem í slíku taki þátt, mjög oft glaðara og hamingjusamara en þeir sem það gera ekki. Vísindamenn hafa rannsakað áhrif þau sem hópsöngur hefur á fólk, og niðurstöðurnar sýna fram á betra skap, minni streitu, og jafnvel virðist ónæmiskerfið hafa gott af hópsöngnum. Einnig kom í ljós að söngur skilar að miklu leyti sömu áhrifum og þær æfingar sem tengjast djúpri öndun og þekktar eru úr fræðum jóga og notaðar um allan heim. Söngurinn framkallar mjög svipaðan andardrátt og æfingarnar og þjálfar lungu, þind og magavöðva.

Já, söngurinn gefur þér jafnvel hið langþráða "six-pack". 

Áfram heldur greinin því ekki virðist nóg með að söngurinn hafi góð áhrif á þann sem syngur.

Vitnað er í bók Harvard prófessorsins Robert Putnams "Bowling Alone: The Collapse and Revival of American Community" en þar kemur fram að  höpsöngur geti hvatt áheyrendur til góðrar virkni, eins og til dæmis sjálfboðavinnu eða pólitískra aðgerða, og má svo sem komast þannig að orði að það hefði ekkert veitt af smá sjálfboðavinnu eða pólitískum aðgerðum hjá okkur leikmönnunum í gærkvöldi.

Putnam bendir einnig á hópsöng sem leið til þess að efla "félags-auð" sem byggður er upp af trausti og samhygð milli einstaklinga innan hópa og vinnur að því að gera fólk eins hamingjusamt og mögulegt er.

Grein þessari, sem hér um ræðir lýkur svo á tilvitnun í Garrison nokkurn Keilor, en hún er svohljóðandi:

"Að syngja svona, í félagsskap annara sála, og framkalla þessa samhljóma svo auðveldlega í einum rómi, og að gera þessa tóna svo ríka að þeir færi tár til augna þinna. Það er stórfengleiki." 

 

Þessi pistill minn er ALLS ekki skrifaður til þess að gera lítið úr því góða fólki sem mætir og borgar sig inn á leiki hjá okkur. Hér er fyrst og fremst um að ræða laugardagsmorguns-hugleiðingu áður en formlegur undirbúningur fyrir hörkuleik gegn Eyjamönnum á mánudag hefst, og ef til vill ekki síður áminning til þeirra sem sækja völlinn um það að þeir geta svo sannarlega verið okkar tólfti maður, með því að taka virkan þátt í leiknum.

Og af lestri þessarar hugleiðingar má sjá, að það gæti jafnvel verið gott fyrir heilsu þína líka. 

Þennan pistil byrjaði ég á tilvitnun í lag og því er við hæfi að enda hann líka á einni slíkri, en þar er um að ræða lag skoskrar sveitar sem ber nafnið Travis.

 

"Sing,sing,sing.....

for the love you bring, won´t mean a thing,

unless you sing...sing sing sing." 

 

Skemmtilegt myndband þessa ágæta lags má finna hér

Góðar stundir.

Húni. 

Sorry!!

Er það eina sem ég get sagt eftir svona hörmulega frammistöðu. Ef ég fengi að ráða þá myndi ég vilja endurgreiða aðgangseyrin þeim sem komu að horfa á okkur. Við borgum ykkur þetta til baka á vellinum á mánudaginn.

Óli Stefán

Hvað er að frétta?

Í haust þegar við féllum varð fljótlega nokkuð ljóst að nokkrir leikmenn myndu yfirgefa skútuna. Flestir fóru þeir í úrvaldsdeildina til að sigra heiminn. Nú er deildin þar nánast hálfnuð og menn að standa sig misvel

Óðinn Árnason varnarmaðurinn sterki og fyrirliðið í fyrra fór í Fram. Hann festi sig strax í sessi og var að spila hafsent í vetur. Þegar Íslandsmótið byrjaði var hann færður í hægri bakvörð. Óðinn skoraði strax í sínum fyrsta leik, nokkuð sem pjakkurinn gerði ekki hjá okkur í 4 ár. Það sem ég hef séð og lesið um Óðinn þá viðist hann vera standa sig vel. Á spjallinu þeirra var jafnvel talað um að hann hafi verið þeirra jafnbesti maður í sumar.

David Hannah hafsentinn á móti Óðni fór í Fylki. Ég vil meina að hann hafi valið Fylki því að búningurinn þeirra er eins og Dundee United búningurinn en þar spilaði hann lengst um. David er búinn að spila vel og eru menn þar í skýunum með þessi kaup enda er hann hörku leikmaður og mikill leiðtogi.

Kristján Valdimarsson hægri bakvörður fór aftur heim í Árbæinn og er núna að spila hafsent með David. Stjáni er þar að koma mönnum verulega á óvart því hann er búinn að slá út menn eins og Val Fannar og Guðna Rúnar þannig að hann er heldur betur að standa sig. Reyndar var undirritaður að benda honum á það síðasta sumar að reyna að prufa hafsent þannig að það kemur mér ekki á óvart að hann sé að spila þar núna.

Óskar Örn Hauksson varð í haust einn eftirsóttasti leikmaður landsins þannig að það kom svosem ekkert á óvart að hann færi. Óskar valdi á endanum KR en hefur ekki náð að festa sig í sessi þar og er bara þræl óánægður enda góðu vanur hér í Grindó. Vonandi fer að birta til hjá honum því við vitum það allavega hér að Óskar er frábær leikmaður

Jóhann Þórhallsson sem skoraði 10 mörk fyrir okkur fór einnig í KR. Jói hefur heldur ekki náð að festa sig hjá KR og þarf að sitja löngum stundum á bekknum. Mér hreinlega finnst það skjóta skökku við að vera með svona marka maskínu á bekknum á meðan KR er ekki að skora mörk.

Jóhann Helgason fór í Val en var alltaf hikandi. Hann spilaði töluvert í vetur en datt síðan aftar í gogguna röðina hjá þeim þegar mótið nálgaðist. Jói var fljótur að sjá af sér og fór fram á það að vera lánaður til okkar. Eftir að hafa þurft smá tíma til að endurheimta sjálfstraustið hefur hann farið á kostum hvort sem er á miðjunni eða á kantinum. Jói skoraði tvö mörk í fyrri hálfleik á móti Þór úti sem voru utan af velli og það síðara hugsanlega mark ársins.

Ég vona að ég sé ekki að gleyma neinum. Við erum allir í góðu sambandi við þessa drengi og sjást þeir oftar en ekki á leikjum hjá okkur núna í sumar.

Óli Stefán

Leikjaálag

Já það er óhætt að segja að það sé nóg að gera þessa dagana. Frá síðasta föstudagi þegar við spiluðum við Þrótt í deildinni og fram á mánudaginn næsta þegar við spilum við ÍBV þá erum við að spila 4 leiki á 10 dögum. Við spiluðum sem sagt við Þrótt í deildinni og unnum 2-1 æfðum sunnudag og mánudag spiluðum þriðjudag í bikarnum og töpuðum 0-1, frí í dag, æfum á morgun, spilum á föstudag við Fjölni í Grafarvogi, frí laugardag æfing sunnudag og leikur við ÍBV á mánudag. Við erum því að spila jafn marga leiki og við æfum á þessum tíma og svo er stórleikur við Reyni föstudaginn eftir ÍBV leikinn. Við nátturlega kvörtum ekkert yfir þessu en auðvitað tekur þetta á og gott að vera með stóran hóp. Að vísu hefur hópurinn þynnst jafnt og þétt síðustu vikur. Helgi Már er að byrja að skokka eftir meiðsli en ennþá er tími i hann. Mike er ennþá meiddur. Jóhann, Palli og Þorfinnur farnir í GG og Eyþór Atli hættur. Goran frá út tímabilið, Alex og Paul meiddir og ekki vitað hversu mikið sömuleiðis Scotty sem spilaði tæpur í bikarnum og gerði það illt verra. Þetta eru 10 leikmenn sem byrjuðu mótið en eru úti eins og staðan er í dag. Auðvitað er þetta ekki heimsendir og við erum ennþá með í lið. Það er líka gaman að segja frá því að í hópinn á móti Þrótti í bikarnum komu Emil Daði 18ára, Óli Daði 18 ára, Óli Baldur 17ára og Markó 16 ára. Ég vil að endingu hvetja menn til að mæta í Grafarvoginn á föstudag kl 20:00 og hjálpa okkur í gegnum þann slag. Vitað er að stuðningsmenn Fjölnis ætla að láta Andra Stein heyra það en Andri er uppalinn Fjölnismaður.

Óli Stefán 

Hin hliðin á stuðningsmanni Grindavíkur: Gunnar Már Gunnarsson

Jæja þá er komið að Hammernum að sýna á sér hina hliðina. Það stendur ekki á svörunum hjá karlinum og það eru svör á tveimur spuningum sem koma held ég engum á óvart en það eru svörin við því hvað hann eldaði síðast og uppáhalds drykkur.

Fullt nafn:  Gunnar Már Gunnarsson

 

Gælunafn:  Ætli það sé ekki Hammerinn

 

Aldur:  34 ára

Giftur/sambúð:   Ég er í sambúð með Siggu Hammer, barnabarni Gerðu Hammer og Sigurðs Ólafssonar heitins.

Börn: Ég á 3 börn sem vitað er um.  Elst er Súsanna Margrét fædd 1996, næstur kemur Dagur Ingi fæddur árið 2000 og svo kom hún Tinna Björg í fyrra.

 

Hvað eldaðir þú síðast?  Það var kalkúnn á sunnudaginn síðasta með La Gorme fyllingu sem er krydduð m.a. með Le Fleur og Belladonne kryddi frá Suður Ameríku.  Nei veistu það að ég gersamlega fraus við þessa spurningu, það var nú sennilega bara samloka með skinku og osti í örbylgjunni.

 

Hvað vilt þú fá á pizzuna þína?   Ég er hrifinn af skinku, osti og sveppum þessa dagana.

Hvernig gemsa áttu? Nokia

Uppáhaldssjónvarpsefni? Mér finnst uppáhaldsþættirnir hans Hjalla góðir, 24 og Shield.  Svo þar sem ég er svo mikill dansari sjálfur að þá er "So you think you can dance" nokk góður!!

Besta bíómyndin?   The Cellar Man

Hvaða tónlist hlustar þú á? Sennilega allt nema þungarokk.

Uppáhaldsútvarpsstöð? Bylgjan (bara fyrir Bjarka ;o))

Uppáhaldsdrykkur? Ég veit hvað sumir vilja sjá hérna en vatnið okkar er það besta sem ég fæ en jú....kaldur Viking er asskoti góður!

 

Uppáhaldsvefsíða ?  http://www.sjova.is/ og http://www.landsbanki.is/  hmmm..!

 

Ertu hjátrúarfullur fyrir leiki (ef já, hvernig þá?)?  Já ég verð að segja það.  Ef einn kaldur dugar ekki fyrir marki þá verð ég að drekka annann.  En ef einn dugar þá skálum við með öðrum og koll af kolli! 

Hvernig er best að pirra andstæðinginn? Með því að sigra hann.  Þoli ekki að tapa!

 

Hvaða liði myndir þú aldrei spila með? Man Utd.

 

Hvert var átrúnaðargoð þitt á yngri árum? Kenny Dalglish og Ian Rush

Erfiðasti andstæðingur? Bjarki Rooney Guðmundsson

EKKI erfiðasti andstæðingur?  Ingvar Guðjónsson

Besti samherjinn? Guðjón Ásmundsson

 

Sætasti sigurinn? Að vinna Stjörnuna í í undanúrslitum bikarsins 1994 í vítasp. keppni.  Haukur Braga snillingur var þá búinn að verja vítaspyrnu í framlengingunni.  Annars voru leikirnir við FH og ÍBV í bikarnum þarna sama ár mjög sætir, líka í unnir í vítasp.keppni.

 

Mestu vonbrigði? Að setja'nn ekki í hörkuskotinu mínu í bikarúrslitunum á Laugardagsvellinum 1994 sem endaði í stönginni.

Uppáhalds lið í enska boltanum? Liverpool

Uppáhaldsknattspyrnumaður? Er og verður alltaf Kenny vinnur minn Dalglish.

Besti íslenski knattspyrnumaðurinn fyrr og síðar? Það er Eiður Smári.

 

Efnilegasti knattspyrnumaður landsins? Dagur Ingi Hammer að sjálfsögðu.

Fallegasti knattspyrnumaðurinn í deildinni? Það hlýtur bara að vera Gummi Bjarna, þvílíkan þokka sem maðurinn ber.

 

Fallegasta knattspyrnukonan? Elín Anna Steinarsdóttir

Grófasti leikmaður deildarinnar? ORRI!!

Besti íþróttafréttamaðurinn? Arnar Björnsson

EKKI besti íþróttafréttamaðurinn? Gaupi

 

Hver er mesti höstlerinn í liðinu? Dragan

Hefurðu skorað sjálfsmark? Ekki svo ég muni eftir og ég væri sennilega búinn að blokkera það út ef það hefði gerst.

 

Segðu okkur frá skemmtilegu atviki sem gerst hefur í leik: Það var þarna einu sinni 1994 á móti KR.....;o))....neinei kem ekki með þessa sögu.  Ég á bara enga góða sögu handa ykkur, minn fótboltaferill hefur greinilega verið hundleiðinlegur!

 

Spilar þú Championship Manager tölvuleikinn? Nei það geri ég ekki

 

Hvenær lékstu þinn fyrsta leik með meistaraflokki? Ég hreinlega man það bara ekki.  Það hefur sennilega verið með vini mínum Bjarna Jóh 1992.

 

Hvernig finnst þér Fótbolti.net? Virkilega flott síða hjá þeim.

 

Kíkir þú oft á Fótbolti.net? Daglega

 

Ef þú mættir breyta einni reglu í fótbolta, hverju myndir þú breyta?  Þegar leikmaður fær rautt fyrir brot innan vítateigs og vítaspyrna er dæmd.  Mér finnst það gróft, á bara að vera gult á leikmanninn.

 

Hvern vildir þú sjá á sviði? (tónleikum)  Ingvar Guðjónsson

 

Hvað finnst þér leiðinlegast að gera á æfingu? Hlaupa án bolta

 

Hver er frægasta persónan sem þú ert með í farsímanum þínum? Ætli það sé ekki Gauji Einars, vallarstjóri á Húsatóftum. 

 

Hver er uppáhaldsstaðurinn þinn í öllum heiminum? Það er klárlega smábæjarsálin sem stýrir mér í þessu svari og það er að sjálfsögðu Grindavík.  Ég get ekki séð að ég muni nokkurn tímann fara héðan.

 

Hversu lengi ertu að koma þér í gang á morgnanna? Ég er lengi í gang.....það er pínu díselvél í mínum.

 

Hver er uppáhaldsÍÞRÓTTAMAÐURINN þinn? Leifur Köggull Guðjónsson

 

Fyrir utan knattspyrnu, fylgist þú með öðrum íþróttum? Fylgist og fylgist ekki...........hvað er íþrótt í dag?

 

Hver er uppáhalds platan þín? Ég plataði einu sinni Sibba í landsbankanum......það er uppáhaldsplatan mín.

 

Hvenær borgaðir þú þig síðast inn á knattspyrnuleik? Í fyrra einhverntímann.

 

Í hvernig fótboltaskóm spilar þú? Adidas

 

Í hverju varstu/ertu lélegastur í skóla?  Sundi, agalega fannst mér þetta leiðinlegt og finnst enn! 

 

Ég ætla svo að skora á hann Einar Hannes Harðarson, harðan sjálfstæðismann og stuðningsmann að koma með hina hliðina  á sér.

 

 

 

Eyþór hættur

Þær leiðinlegu fréttir bárust okkur gær að Eyþór Atli væri hættur með Grindavík í en Eyþór hefur ekki fengið að spreyta sig sem skildi í sumar. Mér skilst að þessi ákvörðun hafi verið gerð í mesta bróðerni og auðvitað skilur maður karlinn að vissu leiti. Eyþór er gríðalega sterkur miðjumaður og einn af þeim betri í þessari deild og það eitt að hann sé ekki að spila sýnir kannski hvað við erum með sterkan hóp. Við leikmenn óskum Eyþóri velfarnaðar í því sem hann tekur sér fyrir hendur og vonumst auðvitað til að sjá hann sem fyrst í Grindavík aftur

Óli Stefán